Í fangelsi fyrir umferðarlagabrot

Héraðsdómur Reykjaness dæmdi í dag karlmann í mánaðarfangelsi og til sviptingar ökuréttinda ævilangt fyrir tvö umferðalagabrot á þessu ári. Maðurinn var ákærður fyrir of hraðan akstur annars vegar og ölvunarakstur hins vegar en hann hefur áður komist í kast við lögin og verið dæmdur fyrir bæði þjófnaði og umferðarlagabrot. Hann var meðal annars sviptur ökuréttindum í tvö ár árið 2000 fyrir ölvunarakstur en sá dómur hefur ítrekunaráhrif og því er maðurinn sviptur ökuréttindum ævilangt. Hann var einnig dæmdur til að greiða allan sakarkostnað.