Flat­eyringar minnast látinna

"Þetta verður einföld bæna stund þar þem Önfirðingar hér á höfuðborgar svæðinu koma saman til að minnast þeirra sem fórust í snjóflóðinu fyrir tíu árum síðan," segir séra Örn Bárður Jónsson, sem leiðir bænastundina í Neskirkju.

Í íþróttahúsinu á Flateyri flytja heimamenn ásamt landsþekktum tónlistarmönnum tónlist, suma hverja frumsamda í tengslum við flóðið. Vigdís Finnbogadóttir, fyrrverandi forseti Íslands, flytur ávarp og lesin verða ljóð. Þá fer sóknarpresturinn á Flateyri, séra Stína Gísladóttir, með bæn.

Að lokinni skipulagðri dagskrá í kvöld býður Ísafjarðarbær upp á kaffiveitingar.

Þakka stuðninginn

"Ósk Flateyringa er að sem flestir geti verið með þeim á minningardagskránni. Þeir vona að hlýjar kveðjur og þakklæti berist þeim fjölmörgu sem veittu þorpsbúum lið fyrir tíu árum þegar náttúruhamfarirnar riðu yfir. Björgunarsveitarmönnum, Rauða krossi Íslands, þeim sem lögðu fé í landssöfnunina Samhugur í verki og öllum öðrum sem studdu þá á erfiðum stundum og við uppbyggingu eftir snjóflóðið", segir í tilkynningu frá undirbúningsnefnd minningardagskrárinnar, en að henni stendur minningarsjóður Flateyrar.

Hann var stofnaður haustið 1996 og hefur meðal annars reist í bænum minningarstein um þá sem létust í flóðinu, séð um framkvæmdir við Minningargarðinn þar sem áður var byggð efst í þorpinu og skipulagt kyrrðar- og minningarstundir í Flateyrarkirkju 26. október ár hvert frá 1996.

Ljóst má vera að margir eiga um sárt að binda á þessum tímamótum, enda skilur mann skætt snjóflóð eftir sig djúp sár. Í viðtölum við fólk sem lenti í flóðinu kom fram að misjafnlega gengur að vinna úr áfallinu.

Margir fluttu burt

Nálægt því hundrað manns fluttu á brott frá Flateyri fyrstu mánuðina og árin eftir flóðið og nær allir þeir sem misstu nánustu fjölskyldu og ástvini. Í þeim hópi eru eðlilega þeir sem enn eiga hvað sárast um að binda enn þann dag í dag.

Þeir sem enn búa á Flateyri minnast vitanlega hörmunganna með sorg í hjarta, en þar hefur töluvert uppbyggingarstarf verið unnið síðustu ár og flestir vongóður um bjarta framtíð bæjarfélagsins. Uppgangur er í fiskvinnslu og útgerð á staðnum og næga vinnu að fá. Þá hefur flust til staðarins mikið af erlendu verkafólki sem smám saman samlagast íslenskum aðstæðum og tungumáli og er á góðri leið með að verða jafnmiklir Flateyringar og hver annar. Í þeim hópi eru meðal annars einstaklingar sem taka þátt í endurbótum á gamla samkomuhúsi bæjarins við Grundarstíg, en þær tengjast félagslegri uppbyggingu sem íbúasamtök Flateyrar hafa staðið fyrir.