Chelsea valtaði yfir Liverpool

Chelsea heldur áfram óstöðvandi sigurgöngu sinni í ensku úrvalsdeildinni í knattspyrnu með 4-1 sigri á Liverpool á Anfield í dag. Frank Lampard, Damien Duff, Joe Cole og Geremi skoruðu mörk Chelsea en Steven Gerrard mark Liverpool þegar hann jafnaði metin í 1-1. Eiður Smári Guðjohnsen var ekki í leikmannahói Chelsea í dag þar sem hann er að jafna sig eftir handarbrot sem hann varð fyrir á æfingu með Chelsea nýlega. Frank Lampard kom Chelsea 1-0 yfir á 27. mínútu með marki úr vítaspyrnu sem dæmd var á Djimi Traore en hann braut á Didier Drogba í vítateignum. Lampard fékk svo gult spjald fyrir fagnaðarlæti sín. Steven Gerrard jafnað metin fyrir Liverpool, 1-1, eftir hornspyrnu John Arne Riise á 36. mínútu og náði Jamie Carragher að skalla boltann út í teiginn þar sem fyrirliðinn Gerrard hamraði boltann í hornið fjær úr mjög þröngu færi. Damien Duff kom Chelsea aftur yfir í 1-2 á 42. mínútu og þannig var staðan í hálfleik. Duff skoraði eftir frábæran undirbúning Didier Drogba sem losaði sig skemmtilega við Sami Hyypia og kom boltanum á Duff. Joe Cole kom Chelsea í 3-1 og enn á ný var það Didier Drogba sem skapaði mark fyrir gestina og lagði upp fyrir Cole á 63. mínútu. Njitap Geremi gulltryggði Chelsea sigurinn á 82. mínútu eftir að Arjen Robben hafði kiksað og boltinn barst á fjærstöng þar sem enginn varnarmaður Liverpool var fyrir Geremi. Chelsea er enn með fullt hús stiga á toppi deildarinnar eftir 8 leiki, er með 24 stig á meðan Charlton er með 15 stig í öðru sæti, eins og Tottenham.