Allardyce vill taka við Englandi

"Stóri-Sam" Allardyce, knattspyrnustjóri Bolton, vill ólmur taka við enska landsliðinu þegar Sven-Göran Eriksson hættir með liðið, ef marka má orð umboðsmanns hans. "Sam hefur áhuga á starfinu og stjórn Bolton er það vel kunnugt," sagði umboðsmaðurinn og fyrrum aðstoðarmaður Allardyce, Phil Brown, tekur í sama streng og segir Allardyce rétta manninn í starfið. "Sam hefur alltaf verið langt á undan sinni samtíð í þjálfun og meðhöndlun leikmanna. Hann hefur sýnt það hjá Bolton að hann hikar ekki við að kippa stjörnunum út úr liðinu ef honum þykja þær ekki standa sig og það er til marks um það hve sterkur hann er;" sagði Brown.