Klinsmann hefur ekki áhyggjur

Jurgen Klinsmann, landsliðisþjálfari Þjóðverja, hefur hvatt leikmenn sína til að láta harða gagnrýni fjölmiðla og sérfræðinga á liðinu sem vind um eyru þjóta og segir það að þola gagnrýni vera hluta af starfinu. Árangur Þjóðverja í undanförnum leikjum hefur ekki verið að skapi manna eins og Franz Beckenbauer, sem þótti tapið gegn Slóvökum um daginn ekki liðinu til framdráttar og lét Klinsmann heyra það í kjölfarið. "Það verða alltaf sjálfskipaðir sérfræðingar og fjölmiðlamenn sem munu láta okkur heyra það, en ég segi leikmönnum mínum mínum að velta sér ekki upp úr því. Það mikilvægasta er að reyna að læra af hverjum leik og bæta okkur í framhaldinu. Ef ég skoða liðið í dag og ber það saman við hvernig það lék í ágúst, tel ég að megi sjá breytingar til batnaðar," sagði Klinsmann, sem náð að sigra í ellefu af þeim nítján leikjum sem hann hefur stýrt liðinu.