Dæmd fyrir stórfelld fíkniefnabrot

32 ára maður var í gær dæmdur í eins og hálfs árs fangelsi fyrir stórfelld fíkniefnabrot og fleiri brot. Þá var í sama dómi 26 ára gömul kona dæmd í hálfsársfangelsi. Dómarnir voru upp kveðnir í Héraðsdómi Reykjaness, en þeir eru skilorðsbundnir að hluta. 15 mánuðir af refsingu mannsins eru skilorðsbundnir í þrjú ár og öll refsing konunnar. Manninum er meðal annars gefið að sök að hafa afhent konunni til söludreifingar 295 töflur af MDMA (e-töflur) og 782 grömm af kannabis í ársbyrjun í fyrra. Töflurnar og rúm 580 grömm af kannabisi voru svo gerð upptæk á heimili konunnar í mars og tæp 200 grömm af kannabisi sem voru í handtösku hennar úti í bíl. Sama dag var gerð húsleit hjá manninum og fundust heima hjá honum í Hafnarfirði og í nágrenni íbúðar hans milli steina, fleiri tugir gramma af amfetamíni, kókaíni og kannabis, auk fleiri hundrað e-taflna. Maðurinn greiðir yfir milljón króna í sakarkostnað og konan rúm 600 þúsund.