Reyndu að smygla amfetamíni og LSD

Tveir menn á þrítugs- og fertugsaldri voru í dag dæmdir í Héraðsdómi Reykjavíkur í sex og sex og hálfs árs fangelsi fyrir tilraun til að smygla tæpum átta kílóum af amfetamíni og töluverðu magni af LSD til landsins frá Hollandi. Alls voru sakborningarnir í málinu fimm og fengu aðrir tveir sem að málinu komu annars vegar hálfs árs fangelsisdóm og hins vegar fjögurra mánaða skilorðsbundið fangelsi. Þá var fimmti maðurinn sem hugðist taka á móti amfetamínsendingunni en gerði ekki, sektaður um 40 þúsund krónur fyrir aðild sína að málinu. Sjötti maðurinn sem þátt átti í málinu er nú látinn. Mennirnir komu amfetamíninu fyrir í loftpressu sem send var til landsins frá Hamborg í Þýskalandi með flutningaskipinu Dettifossi en tollverðir fundu það við leit þann 21. júlí í fyrra. Framkvæmdastjóri fyrirtækisins Bindis ehf. átti að leysa hana út en hvikaði síðan frá þeirri ætlan. Þess vegna er hann einungis dæmdur í fjársekt. LSD-skammtarnir tvö þúsund voru sendir í sendibréfi í september en tollgæslan fann þá við leit í Póstmiðstöðinni. Höfuðpaurinn í báðum málum fékk sex og hálfs árs dóm og sá er tók næstmestan þátt fékk sex ár, ekki síst vegna þess að hann hefur á síðustu árum gengist undir lögreglustjórasáttir og hlotið fangelsisdóm fyrir fíkniefnabrot. Sá dómur hefur ítrekunaráhrif nú. Dómara þótti hins vegar rétt að virða þrítugri konu það til refsilækkunar að hún er að vinna bug á fíkniefnavanda sínum og hefur fyrir tveimur börnum að sjá og fékk hún því fjögurra mánaða skilorðsbundinn dóm. Sá fjórði var dæmdur í tveggja ára fangelsi fyrir annað fíkniefnabrot í lok maí og er þessi dómur því hegningarauki upp á sex mánuði.