Þrír mánuðir í fangelsi fyrir árás

Dráttur rannsóknar lögreglu á líkamsárás og breytingar til hins betra hjá árásarmanni urðu til þess að 15 mánuðir af 18 mánaða fangelsisdómi voru skilorðsbundnir í dómi Hæstaréttar í gær. Í héraði var maðurinn dæmdur í 15 mánaða fangelsi, þar af 12 skilorðsbundna. Dóminn hlaut maðurinn fyrir tvær líkamsárásir á árinu 2001, báðar fólskulegar og tilefnislausar, en vegna annarrar þeirra þarf hann líka að reiða fram 200.000 krónur í miskabætur. Maðurinn hefur áður verið dæmdur fyrir ofbeldisverk, fyrsta dóminn hlaut hann árið 1996 fyrir brot sem hann framdi fyrir átján ára aldur.