Braut rúðu í lögreglubíl

Maður braut afturrúðu í lögreglubíl í miðbæ Reykjavíkur á fimmta tímanum í nótt eftir að hafa kastað flösku í bílinn. Tveir lögreglumenn voru í bílnum en sakaði hvorugan þeirra. Maðurinn hljóp á brott og náðist hann ekki. Biður lögreglan þá sem urðu vitni að atburðinum að hafa samband við lögregluna í Reykjavík. Að öðru leyti var nóttin róleg í Reykjavík þrátt fyrir að ölvun hafi verið talsverð. Þá var annasamt hjá lögreglunni á Akureyri í nótt og fengu tveir menn að gista í fangageymslum lögreglunnar vegna mikilla óláta og drykkju í miðbænum. Skýrsla verður tekin af þeim nú í morgunsárið þegar mesta víman er runnin af þeim og þeim ljóst að gamanið er búið. Að öðru leyti var nóttin róleg hjá lögreglunni á Akureyri sem og á landinu öllu.