Sáttatónn í þingflokki Framsóknar

Framsóknarmenn á kjördæmisþingi í Norðvesturkjördæmi sem fór fram í Borgarnesi í gær hvöttu þingflokk framsóknarmanna til að leysa ágreining sem uppi hefur verið innan hans. Þingflokkur ákvað við upphaf þings í haust að kjósa Kristin H. Gunnarsson í engar þingnefndir fyrir hönd flokksins. Fram kemur í ályktun fundarins, sem var samþykkt með lófaklappi, að allir þingmenn flokksins ættu að hafa eðlilega aðstöðu til starfa. Þá var lýst yfir stuðningi við Kristin H. Gunnarsson og Magnús Stefánsson, þingmenn kjördæmisins, og þeir hvattir til að snúa bökum saman og vinna þannig kjördæminu til heilla. Kristinn H. Gunnarsson segist gera ráð fyrir því að þessi mál fari í eðlilegt horf með tímanum og samskiptin í þingflokknum séu að batna. Hjálmar Árnason, formaður þingflokksins, segist taka ályktunina til alvarlegrar athugunar. Fullt mark sé tekið á henni.