Fjórði sigur ÍBV í röð | Myndir

ÍBV gerði góða ferð í Árbæinn og vann 1-4 sigur á Fylki í Pepsi-deild kvenna í fótbolta í kvöld. Þetta var fyrsti leikur kvöldsins af fjórum.

Stefán Karlsson, ljósmyndari Fréttablaðsins og Vísis, var á vellinum og tók myndirnar sem fylgja fréttinni.

Leik var nánast lokið í hálfleik en Eyjastúlkur skoruðu þá fjögur mörk gegn engu Fylkiskvenna.

Shaneka Gordon skoraði tvennu og þær Cloe Lacasse og Kristín Erna Sigurlásdóttir sitt markið hvor en sú síðastnefnda er komin með fimm mörk í Pepsi-deildinni í sumar.

Ólína G. Viðarsdóttir minnkaði muninn í 1-4 á 77. mínútu en nær komust Árbæingar ekki.

ÍBV, sem vann sinn fjórða leik í röð, er eftir leikinn með 13 stig í 3. sæti deildarinnar en Fylkir er í því sjöunda með aðeins fjögur stig.