Elvar með stór­leik í Evrópu­keppninni

Evrópubikarinn eða Euro Cup er næstefsta Evrópukeppni Euroleague.

Elvar endaði leikinn með 24 stig og 9 stoðsendingar en hann skoraði þrjá þrista í leiknum. Elvar hitti úr 64 prósent skota sinna og tapaði aðeins einum bolta á þeim tæpu 34 mínútum sem hann spilaði.

Þrátt fyrir frábæra frammistöðu Njarðvíkingsins þurfti Neptunas að sætta sig við níu stiga tap á móti ítalska félaginu Napoli Basketball, 85-94.

Það munaði aðeins tveimur stigum í hálfleik, 45-47, en Elvar var með 15 stig og 3 stoðsendingar í fyrri hálfleiknum.

Neptunas hefur tapað fjórum af fyrstu fimm leikjum sínum í keppninni en liðið er í sjöunda sæti síns riðils af átta liðum.