Fimm­tán leik­menn meiddir: Er lengra landsleikjahlé betra eða verra?

Breytingin var gerð að frumkvæði FIFA, meðal annars með velferð leikmanna að leiðarljósi. En hvernig hefur það virkað? BBC hefur tekið saman helstu meiðsli leikmanna sem spila í ensku úrvalsdeildinni. Þar telja þeir saman fimmtán leikmenn sem sjá má hér að neðan.

Undanfarin ár hefur FIFA gert ráð fyrir fimm landsliðshléum á tímabilinu. Þau hafa yfirleitt verið í tvær vikur í mars, júní, september, október og nóvember. Frá og með þessu tímabili hefur landsliðshléum hins vegar verið fækkað í fjögur og hléið í lok september og byrjun október lengt í þrjár vikur. Þetta ku hafa verið gert til að gæta að velferð leikmanna, ekki síst vegna ferðalaga. Með færri landsliðshléum fækkar ferðum sem sumir leikmenn þurfa að fara í milli heimsálfa.

Lengra landsleikjahlé þýðir vissulega ekki að leikmenn meiðist frekar í landsleik en í leik með sínu félagsliði en ferðalög og breyting á þjálfunaraðferðum milli félagsliðs og landsliðs gætu spilað inn í. Fjölmargir leikmenn snúa aftur til félagsliða sinna með meiðsli eftir þetta hlé.

Hafa miklar áhyggjur

Erling Haaland þurfti að fara af velli eftir 67 mínútur í leik Noregs gegn Portúgal á sunnudag eftir að hafa beðið um skiptingu. Framherjinn haltraði af velli og yfirgaf svo landsliðsverkefnið á mánudag. Liðsfélagi hans hjá Manchester City, Nico O'Reilly, sneri einnig aftur til félagsins til frekari rannsókna.

Samtök atvinnuknattspyrnumanna í Noregi, NISO, lýstu áhyggjum af auknu álagi eftir meiðsli Haalands.

„Með tímanum höfum við séð áhyggjuefni þar sem álagið á bestu leikmennina er orðið allt of mikið,“ sagði Kristoffer Vatshaug, framkvæmdastjóri NISO.

Hann kallaði eftir skýrari reglum um álag og endurheimt leikmanna, þar á meðal lengd hvíldar milli leikja, fjölda leikja í röð, ferðalög og þann tíma sem leikmenn fá til að jafna sig eftir langt tímabil.

Liverpool hefur einnig orðið fyrir áföllum. Cody Gakpo dró sig úr hollenska landsliðshópnum vegna ökklameiðsla og Alexander Isak hætti við þátttöku í verkefni Svíþjóðar vegna vægra meiðsla í læri.

Jorge Jesus, landsliðsþjálfari Portúgals, hefur sagt frá því að Bruno Fernandes, fyrirliði Manchester United, hafi verið að spila þrátt fyrir verki og væg meiðsli.

Fyrir utan úrvalsdeildina hafa einnig komið upp stór meiðslamál. Kylian Mbappé meiddist með franska landsliðinu og Raphinha sneri aftur til Barcelona frá landsliðsverkefni Brasilíu með meiðsli í læri.