Stjörnur Real Madrid léku sér í stór­sigri á Malaga

Jude Bellingham kom Real Madrid í forystu leiksins með glæsilegu marki. Hann fékk boltann rúmlega 20 metra frá marki, þræddi vörn Malaga og setti boltann örugglega í netið. Leikmenn Malaga kvörtuðu yfir því að Bellingham hafi slegið Angel Recio í andlitið í aðdraganda marksins en myndbandsdómgæsla staðfesti markið.

Á 26. mínútu átti Real Madrid frábæra sókn sem endaði með skoti Mbappe sem fór í varnarmann og skaust upp í loftið. Þar voru Bellingham og Alfonso Herrero, markmaður Malaga, í baráttu um að ná boltanum en boltinn fór af Herrero og í netið.

Aðeins nokkrum mínútum síðar tryggði Mbappe Real Madrid þriggja marka forystu þegar hann kláraði frábæra fyrirgjöf frá Trent Alexander-Arnold. Eftir þriðja markið byrjaði leikurinn að róast enda lítill tilgangur fyrir Real Madrid að rembast við að ná mörkum þar sem Malaga var lítið að ógna.

Lokamark leiksins kom í uppbótartíma þegar Madrídar-liðið vann boltann og keyrði á vörn Malaga. Vinicius Jr. keyrði upp að endalínu og gaf til baka á varamanninn Arda Guler sem kláraði færið vel og innsiglaði 4-0 sigur.

Næsti leikur Real Madrid verður gegn Real Betis í næstu viku.