Tveir látnir og sjö særðir eftir að maður ók niður hjól­reiðalið

Greint er frá málinu á vef The Atheltic núna í morgun en tveir nemendur á öðru ári við Milligan skólann sem voru í hjólreiðaliðinu eru látnir.

Ökumaðurinn, hinn 69 ára gamli John Benfield, hefur verið ákærður í tveimur liðum. Fyrir manndráp af gáleysi og alvarlega líkamsárás. Hann situr nú í fangelsi. 

Sjö af þeim ellefu hjólreiðamönnum úr liði Milligan háskólans sem voru á fjallveginum voru fluttir á Johnson City sjúkrahúsið til meðhöndlunar. Ekki er vitað að fullu um ástand þeirra. 

Hjólreiðaliðið hafði notið góðs árangurs upp á síðkastið. Meðal annars unnið landstitil í tímatöku á USA Cycling Collegiate Road Nationals mótinu. 

„Þetta er ekki bara hópur af krökkum sem ákváðu að fara saman út að hjóla,“ lét Steven R. Finney, saksóknari í Carter -sýslu hafa eftir sér. „Þessir hjólreiðamenn vissu hvað þeir voru að gera. Þeir hjóluðu saman í peloton hóp og einn af drengjunum hafði unnið mót bara um síðustu helgi.“