Haraldur konungur lagður inn á spítala

Í tilkynningu frá konungshöllinni segir að konungurinn hafi glímt við sjálfnæmisblóðleysi (no. hemolytisk anemi), en það er blóðsjúkdómur þar sem líkaminn byrjar að ráðast á eigin rauðu blóðkorn og eyðileggja þau of hratt. Vegna sjúkdómsins hafi hann verið meðhöndlaður með kortisóni undanfarnar vikur vegna þessa sjúkdóms, sem hefur valdið vökvasöfnun í líkamanum.

Hákon krónprins er ríkisstjóri á meðan hinn 89 ára Haraldur konungur er á sjúkrahúsi.

Konungshöllin gefur ekki frekari upplýsingar um ástand konungsins.

Jonas Gahr Støre, forsætisráðherra Noregs, óskar konunginum góðs bata í yfirlýsingu til NTB. „Það er gott að vita að hann fær góða eftirfylgni hjá norska heilbrigðiskerfinu,“ segir Støre.

Samkvæmt umfjöllun NTB var konungurinn 7. ágúst í reglubundinni skoðun á Ríkisspítalanum.

Haraldur hefur verið konungur síðan 1991. Hann og Sonja drottning eiga tvö börn, Hákon krónprins og Mörthu Lovísu prinsessu.

Þetta er ekki í fyrsta sinn sem norski konungurinn glímir við heilsufarsvandamál. Árið 2024 veiktist hann í fríi í Malasíu og var fluttur til Noregs þar sem hann fékk gangráð. Hann veiktist einnig í febrúar í einkavetrarfríi á Tenerife.