Strákarnir hans Sigga Ragga skóluðu Skála og eru á­fram á toppnum

NSÍ vann 4-0 heimasigur á botnliði Skála og náði um leið þriggja stiga forskoti á toppi deildarinnar því KÍ Klaksvík tapaði 2-0 fyrir HB Þórshöfn á sama tíma.

Þetta var langþráður sigur eftir þrjá leiki í röð án sigurs en NSÍ hefur verið á fullu í Evrópukeppni á þessum tíma.

NSÍ gerði út um leikinn fyrir hlé með þremur mörkum í fyrri hálfleiknum sem þeir Petur Knudsen og Marius Kryger Lindh skoruðu en þriðja markið var sjálfsmark í uppbótartíma fyrri hálfleiks.

Gamli Blikinn Klæmint Olsen bætti við fjórða markinu í upphafi seinni hálfleiks og það reyndist vera lokamark leiksins.

Sigurður Ragnar er á fyrsta tímabili með liðið og NSÍ hefur unnið ellefu af átján deildarleikjum og aðeins tapað þremur.