„Það er bara ekkert sniðugt við þetta“

Mörg hundruð ef ekki þúsund minkar sluppu út í Dalsbúi í Mosfellsbæ, síðasta minkabúinu á Íslandi, í nótt.

„Dóttir mín sem býr hérna líka hringdi í mig og sagði: Heyrðu það er minkur hérna í garðinum hjá þér. Ég kíkti út um gluggann hjá mér og þá var einn hvítur,“ segir Reynir Finndal Grétarsson, íbúi í Mosfellsdal. 

Hann hafi nú ekki kippt sér upp við einn mink enda komi þeir stundum í heimsókn. „Sérstaklega á haustin þegar verið er að slátra þá sleppa þeir stundum út. Þannig þeir hafa nokkrum sinnum komið hingað minkar síðustu árin.“

„En svo sá ég að þeim hafði verið sleppt út og fór að kíkja út um gluggana og þá voru fleiri hérna í kringum húsið.“ 

Ástandið minni svolítið á vígvöll enda hafa byssuskot ómað um dalinn frá því í morgun en skotvopnum er beitt við föngun minkanna. Lögreglan hefur einnig flogið drónum um svæðið til aðstoðar við leitina að þeim minkum sem hafa sloppið. 

„Þetta er ekki skemmtilegt. Þetta er ekki sniðugt, að þurfa að vera með haglabyssu að skjóta minka hérna í kringum bæinn.“

„Ef þeir sleppa mega þeir ekki fara inn aftur og þeir geta ekki lifað í náttúrunni. Svo náttúrlega taka þeir sjálfsagt eitthvað af fuglum og annað þannig það þarf að reyna að ná þeim.“

Einhverjir nágrannar í kring séu með hænur og annan búskap og þurfi því að gera ráðstafanir. 

Vaktin: Íbúum verulega brugðið og óttast framtíðina í sveitinni

Hvað finnst þér um þennan verknað, þennan gjörning, að gera þetta? 

„Mér finnst það náttúrulega galið, þetta gerir ekkert fyrir dýrin. Það er verið að skjóta þau núna sem hann hleypti þannig að hann gerði ekkert fyrir þau. 

En svo er annað mál hvort a eigi að vera með svona starfsemi, ég veit það ekki, þetta er náttúrulega síðasta búið á Íslandi. Það er bara ekkert sniðugt við þetta.“