Þrír á sjúkra­hús eftir fyrsta nauta­hlaup ársins í Pamplona

Spænski ríkisfjölmiðillinn RTVE greinir frá því að fimm hafi þurft á læknisaðstoð að halda í morgun og að þrír hafi verið fluttir á sjúkrahús með áverka – einn Bandaríkjamaður og tveir Spánverjar.

RTVE segir frá því að nautin hafi verið óvenjulega hröð í morgun og hlaupið leiðina, sem liggur um 850 metra um miðborg Pamplona, á tveimur mínútum og sextán sekúndum. Tíminn er tuttugu sekúndum hraðari en á síðasta ári.

Mörg þúsund manns söfnuðust saman í miðborg Pamplona í morgun og fylgdust með nokkur hundruð manns hlaupa leiðina á undan nautunum.

Nautahlaupið í Pamplona hefur um árabil sætt mikilli gagnrýni, bæði fyrir að vera hættulegt mönnum og fyrir að illa sé farið með nautin. Mörg nautin – sem eru á bilinu 570 og 610 kíló – slasast í nautahlaupinu og eru síðar drepin á nautaatssýningum. Nautahlaupið fer fram á hverjum morgni til loka hátíðarinnar 14. júlí.

Alls hafa sextán manns látið lífið í nautahlaupinu í Pamplona frá árinu 1924.

San Fermin-hátíðin á rætur að rekja aftur til sextándu aldar en þar er verið að heiðra verndardýrling Pamplona, Fermín.