Stólarnir styrkja sig: „Spilað í stórum leikjum á háu stigi“

Bost er 36 ára Bandaríkjamaður með evrópskt ríkisfang og var síðasta á mála hjá Al-Arabi í Katar. Á sínum ferli hefur hann leikið með liðum á borð við Monaco, Zalgiris Kaunas, Galatasaray og ASVEL.

Titlarnir eru einhverjir á hans ferli. Dee Bost varð Euro Cup meistari með Monaco árið 2021. Hann hefur orðið pólskur meistari og var valinn verðmætasti leikmaður úrslitanna sem leikmaður Zielona Góra. Þá eru titlarnir fleiri frá tíma hans í Svartfjallalandi og Frakklandi.

„Það er mikill heiður fyrir Tindastól að fá leikmann með reynslu, gæði og feril Dee Bost til liðs við okkur. Koma hans sýnir metnað deildarinnar og við erum sannfærð um að hann muni verða mikilvægur hluti af liðinu og stemningunni í Síkinu,“ segir Dagur Þór Baldvinsson formaður körfuknattleiksdeildar Tindastóls.

„Dee er leikmaður sem kemur með mikla reynslu, sigurhugarfar og hæfileika til að gera samherja sína betri. Hann hefur spilað í stórum leikjum á háu stigi og við teljum að hans leiðtogahlutverk, yfirvegun og gæði sem leikstjórnandi muni hjálpa liðinu mikið,“ segir Arnar Guðjónsson þjálfari Tindastóls.

Sjálfur er Dee Bost spenntur fyrir því að spila með Tindastól.

„Ég hef heyrt frábæra hluti um stuðningsmennina, stemninguna í Síkinu og metnaðinn hjá félaginu. Ég hlakka til að hitta alla, leggja mitt af mörkum og berjast fyrir Tindastól,“ segir Dee Bost.