Argentínskar landsliðskonur á Krókinn og önnur var valin í WNBA

Körfuknattleiksdeild Tindastóls hefur samið við argentínsku landsliðskonurnar Florenciu Chagas og Macarena D’Urso fyrir komandi tímabil.

Florencia er 24 ára bakvörður með mikla alþjóðlega reynslu, en Macarena er reynslumikill leikstjórnandi sem kemur síðast frá Spáni þar sem hún lék á háu stigi.

„Flor er ung en kemur samt með mikla alþjóðlega reynslu. Hún var valin í WNBA-nýliðavalinu og er mjög öflugur leikmaður sem getur skorað á marga ólíka vegu,“ sagði Isreal Martin, þjálfari Tindastóls, á miðlum félagsins.

Florencia var valin af Indiana Fever í nýliðavalinu 2021 en fékk aldrei samning hjá félaginu. Hún lék síðast með Obras Basket í Argentínu en hefur spilað í Evrópu frá því að hún var sautján ára, með spænskum, ítölskum og frönskum félögum.

„Ég tel að hún muni hafa mikil áhrif á deildina og við hlökkum mikið til að sjá hana spila fyrir Tindastól,“ sagði Martin.

„Macarena kláraði síðasta tímabil á Spáni á mjög háu stigi. Hún er kraftmikill leikmaður sem passar vel inn í íslenska körfuboltann, fljót og sterk í vörn á boltann, góð skytta fyrir utan þriggja stiga línuna og getur bæði skorað sjálf og skapað færi fyrir liðsfélaga sína,“ sagði Martin.

Macarena D’Urso er 34 ára gömul en hún hefur verið landsliðskona frá árinu 2017, tók þátt í HM 2018 og varð Suður-Ameríkumeistari með Argentínu 2024. Í því móti spilaði einnig Florencia Chagas og hún var valin besti leikmaður mótsins.

„Flor og Maca þekkjast vel úr argentínska landsliðinu og það er mikill styrkur fyrir okkur að fá þær báðar inn í hópinn,“ sagði Martin.

Saman voru þær með 18 stig og 3 stoðsendingar í fyrrnefndum úrslitaleik en Chagas var með 16,2 stig og 2,3 stoðsendingar að meðaltali á mótinu.