Tárin streymdu hjá mömmu Cunha

Myndband af viðbrögðum mömmunnar hefur vakið athygli á samfélagsmiðlum en tárin streymdu niður kinnarnar þegar hún fagnaði syninum.

Cunha var sjálfur nokkuð yfirvegaður en brosti til mömmu sinnar þegar hann sá hana uppi í stúkunni.

Hinn 27 ára gamli Cunha, sem er leikmaður Manchester United, er á sínu fyrsta heimsmeistaramóti og var í fyrsta sinn í byrjunarliðinu í 3-0 sigrinum í fyrrinótt.

Hann þakkaði fyrir sig með tveimur mörkum strax í fyrri hálfleik, í samstarfi við Vinicius Junior sem skoraði svo sjálfur þriðja markið.

Cunha hafði komið inn á sem varamaður í fyrsta leik Brasilíu á HM, í 1-1 jafnteflinu gegn Marokkó, og spilaði þá hálftíma fyrir þjálfarann Carlo Ancelotti sem ákvað svo að tefla Cunha fram frá fyrstu mínútu í fyrrinótt.

Brasilía mætir Skotlandi í lokaumferð riðlakeppninnar á miðvikudagskvöld.