Gunn­laugur fékk ekki að klára hringinn en endaði á fugli

Þessi tvítugi Ís­lendingur opnaði nýjan kafla í ís­lenskri golfsögu í kvöld með því að verða fyrsti íslenski kylfingurinn til að spila á U.S. Open risamótinu í karla­flokki. Mikil reynsla fyrir strákinn unga.

Segja má að þessi fyrsti hringur hafi reynt ansi mikið á Gunn­laug sem að gekk illa með teig­höggin sín. Hann byrjaði hringinn á pari og fékk tvo skolla á fyrstu fjórum holunum en lenti svo einni í tölu­verðu brasi á sjöttu holu, fór hana á átta höggum. Fjórum höggum yfir pari.

Skollarnir urðu alls tveir til viðbótar og var á brattann að sækja fyrir Gunn­laug sem sýndi þó styrk, lét deigan ekki síga og náði í lok dags, á fjórtándu holu, að sækja sinn fyrsta fugl og þar með fyrsta fugl Ís­lendings á þessu risamóti.

Gunn­laugur náði að leika fjórtán af átján holum vallarins á fyrsta hringnum og mun þurfa að leika þær fjórar holur sem eftir standa á morgun áður en hann heldur út í sinn annan hring.

Alls endaði Gunn­laugur daginn á níu höggum yfir pari. Það er rými fyrir bætingu hjá kappanum og hann mun bara eflast við þetta. Góð reynsla í bankann og spennandi að sjá hvað kylfingurinn ungi gerir á morgun.

Sýnt verður beint frá öðrum keppnis­degi U.S. Open á Sýn Sport á morgun. Út­sendingin hefst fyrr en vana­lega, eða klukkan hálf eitt í há­deginu.