Jesús á­fram í Stjörnunni

Gunnar hefur unnið bæði með íslenska landsliðinu og Stjörnunni. Hann kom til Stjörnunnar í úrslitakeppninni 2025 og spilaði stórt hlutverk í að Stjarnan vann sinn fyrsta Íslandsmeistaratitil.

„Það sem gleður mig að sjá þarna er Gunnar Már Jesús sjálfur með kampavínið. Ég hef aldrei séð einn mann hafa eins mikil áhrif á íþróttalið ever. Þetta er kjarkurinn þessi maður. Það er andleg orka frá honum og hann bara lagar menn. Ef þér er illt þá lagar hann þig, ég hef aldrei séð svona apparat. Ingi Þór [Steinþórsson, aðstoðarþjálfari] finnur bara svona menn,“ sagði Baldur Þór Ragnarsson, þjálfari Stjörnunnar, eftir að liðið tryggði sér sinn fyrsta Íslandsmeistaratitil vorið 2025.

Gunnar hefur unnið náið með þjálfurum, leikmönnum, sjúkraþjálfurum og styrktarþjálfurum við utanumhald leikmanna meistaraflokks karla í Garðabænum.

„Sú umgjörð sem sköpuð hefur verið í Garðabænum þar sem ungir uppaldir leikmenn fá að skína í bland við þá reynslumeiri er mér að skapi og mér líður vel hjá Stjörnunni,“ segir Gunnar Már á miðlum Stjörnunnar og hlakkar til áframhaldandi samstarfs.

„Við erum mjög glöð að Gunni velji að vinna áfram með Stjörnunni. Starfið okkar síðustu ár kallar á áframhaldandi fagmennsku og í því er Gunni mikilvægt púsl!“, segir Einar Karl formaður körfuknattleiksdeildar Stjörnunnar.