Bræðurnir á­fram og meistararnir halda þéttum kjarna

Grindvíkingar tilkynntu um það með glæsilegu myndbandi í dag að samningur við Jóhann þjálfara og fjölda leikmanna hefði verið framlengdur. Jóhann hefur verið aðalþjálfari liðsins frá árinu 2022 og áður á árunum 2015-2019, auk þess að hafa verið aðstoðarþjálfari þegar liðið varð Íslandsmeistari 2013 og bikarmeistari 2014. Hann stýrði liðinu til Íslandsmeistaratitils á ný í vor með 3-1 sigri gegn Tindastóli í úrslitaeinvíginu.

Bróðir Jóhanns, Ólafur Ólafsson, hefur framlengt samning sinn við félagið til tveggja ára. Ólafur, sem missti af lokaleik tímabilsins vegna ristarbrots, verður 36 ára í nóvember en er hvergi nærri hættur og skrifaði undir samning til næstu tveggja ára.

Kristófer Breki Gylfason skrifaði einnig undir samning til næstu tveggja ára og þeir Ragnar Örn Bragason og Arnór Tristan Helgason verða sömuleiðis áfram með Grindvíkingum.

Áður var ljóst að DeAndre Kane yrði áfram með Grindavík á næstu leiktíð. Hann var handtekinn við komuna heim til Pittsburgh fyrir viku síðan, vegna meðlagsskuldar frá árinu 2023, en sleppt fljótt og reikna Grindvíkingar ekki með að málið hafi nein áhrif á að hann spili í Bónus-deildinni á næstu leiktíð.

Jeremy Pargo, fertuga hetjan frá lokaleiknum á Sauðárkróki þegar Grindavík tryggði sér Íslandsmeistaratitilinn, verður hins vegar ekki með Grindvíkingum nema eitthvað mikið breytist. Leit stendur yfir að bandarískum leikmanni.

Óvissa ríkir svo um Jordan Semple og Daniel Mortensen en samkvæmt upplýsingum Vísis er verið að vinna í þeirra málum og ekki útilokað að báðir verði áfram í herbúðum Grindavíkur.