Sjáðu mörkin: Norð­menn rúlluðu yfir Svía og glæsi­mark Isak

Bæði lið eru á leið á komandi heimsmeistaramót en tvær stærstu stjörnur Norðmanna voru fjarverandi í gær. Erling Haaland fylgdist með úr stúkunni og Martin Ödegaard fær stutt frí eftir úrslitaleik Meistaradeildarinnar með Arsenal um helgina áður en hann kemur til móts við norska hópinn.

Þrátt fyrir að þeir tveir hafi verið fjarverandi er að finna aðrar sóknarógnir í sterku norsku liði. Jörgen Strand Larsen, framherji Crystal Palace, skoraði tvö marka Norðmanna og Antonio Nusa, leikmaður RB Leipzig, eitt. Noregur leiddi 3-0 í hálfleik.

Alexander Isak, framherji Liverpool og sænska landsliðsins, átti agalega fyrstu leiktíð eftir að hann varð dýrasti leikmaður í sögu ensku úrvalsdeildarinnar. Hann sýndi gæðamerki í eina marki Svía í leiknum og ljóst að þörf er á því fyrir Svía að hann finni fjölina ætli liðið sér einhverja hluti á mótinu vestanhafs.

Leikurinn var sýndur á Sýn Sport Viaplay í gær og mörkin má sjá í spilaranum.

Tveir leikir verða sýndir á Sýn Sport Viaplay í dag. Króatar og Belgar mætast klukkan 15:50 og klukkan 18:35 hefst bein útsending frá leik Wales og Gana.