Gerir ekki ráð fyrir heim­komu

Elvar samdi við spænska körfuboltaliðið Tenerife í síðustu viku og klárar tímabilið með liðinu. Landsliðsmaðurinn er 31 árs og vill halda áfram atvinnumennsku úti.

„Þetta er svona aðallega bara tækifæri fá að stíga aðeins inn í þessa deild og sýna hvað ég get, þótt þetta sé stuttur tími, en vonandi hjálpar þetta fyrir komandi tímabil,“ segir Elvar í Sportpakkanum á Sýn í gærkvöldi.

„Þetta er allavega mjög gott tækifæri til að svona fá að sýna sig aðeins í þessari deild.

En ég held að það að fá þetta á ferilskrána muni alltaf hjálpa mér í sumar, hvort sem það verður þetta lið eða nýtt lið. Þannig að vonandi næ ég bara að gera það besta úr tækifærinu.“

Verður vonandi áfram úti

Elvar gerir ekki ráð fyrir að koma heim í Bónusdeildina eftir sumarið.

„Aldrei að segja aldrei, en ég ætla allavega að halda þeim möguleika opnum fyrst að vera hérna úti. Ég er að fá svakalegan pall til að sýna mig. Ég býst við, ef ég geri vel, að geta fengið einhver tilboð í sumar og svo ætla ég bara að skoða og sjá til.“

Íslenska landsliðið leikur gríðarlega mikilvæga landsleiki í júlí, gegn Ítölum heima 2. júlí og síðan Bretum úti 5. júlí. Ef vel fer kemst Ísland í næsta stig undankeppni HM sem fram fer í Katar á næsta ári.

„Ég átti að byrja að æfa með landsliðinu 20. júní þannig að ég náði einhverri tíu daga pásu. Ég hélt að ég væri kominn í gott sumarfrí en núna mæti ég bara á flugi inn á landsliðsæfingar.“