Þakkaði ekki Manchester United fyrir að vera í HM-hóp

Marcus Rashford þakkaði Unai Emery, Hansi Flick, Thomas Tuchel, Aston Villa, Barcelona og Englandi fyrir að hafa trú á honum. Rashford segist vera búinn að ganga í gegnum erfiða tíma undanfarið og þakkar þeim innilega stuðninginn.Thomas Tuchel þjálfari enska landsliðsins tilkynnti hóp leikmanna sem hann ætlar að taka með sér á HM í sumar og var Rashford með í þeim hóp.

Marcus Rashford fór á láni til Aston Villa í janúar í fyrra frá uppeldisfélaginu sínu Manchester United, eftir að hafa lent í deilum við þáverandi þjálfara liðsins, Ruben Amorim.

Um sumarið var Amorim ennþá þjálfari Manchester United og gerði liðið samning við Barcelona um að Rashford færi þangað að láni í eitt ár og síðan gæti Barcelona keypt hann eftir að láninu lýkur á 25 milljónir punda. Ekki er víst hvort Barcelona nýti ákvæðið í samningnum til að kaupa Rashford eða hvort hann komi til baka til Manchester United.

Einhverjum fannst orðalag Rashford í færslunni á Instagram skrítið þar sem hann þakkar ekki neinum úr herbúðum Manchester United.

Rashford leiðréttir misskilninginn og segir að þessi færsla átti á engan hátt að gagnrýna Manchester United.

„Ég held með Manchester United og mun gera það áfram. Ég var að þakka félögunum og þjálfurunum sem hjálpuðu mér síðustu átján mánuði.“

Þetta er fimmta stórmótið sem Rashford tekur þátt í með Englandi en hann var ekki í hóp á EM 2024.