Bak­verðirnir skutu Spurs á­fram í úr­slit vestursins

Spurs kláruðu seríuna þannig 4-2 í sex leikjum og mæta ríkjandi meisturum Oklahoma City Thunder í úrslitum vestursins. Fyrsti leikur þeirra verður á mánudagskvöld.

Bakverðirnir Stephon Castle, De‘Aaron Fox og Dylan Harper áttu stórleik í nótt og skoruðu rúmlega helminginn af 139 stigum Spurs. Samkvæmt ESPN var þetta þriðji stigahæsti leikur Spurs í sögu úrslitakeppninnar.

Castle var stigahæstur með 32 stig, þar af fimm þrista, auk 11 frákasta og 6 stoðsendinga. Fox skoraði 21 stig úr 80 prósent skotnýtingu og Harper setti 15 stig á töfluna.

Castle varð aðeins fimmti leikmaðurinn í sögu Spurs til að ná að minnsta kosti 30 stigum, 10 fráköstum og 5 stoðsendingum í útsláttarleik, og slóst þar með í hóp með Manu Ginobili, Tim Duncan, Robinson og George Gervin.

Ljóst er að andstæðingar Spurs geta ekki bara einblínt á Victor Wembanyama í vörninni með svona öfluga bakverði fyrir aftan hann. Wembanyama skilaði samt 19 stigum, 6 fráköstum og 3 vörslum.

Deildarmeistarar Detroit héldu sér á lífi

Detroit Pistons björguðu sér aftur frá útslætti með 115-94 sigri gegn Cleveland Cavaliers. Serían er á leið í oddaleik en Detroit hafði lent 3-1 undir. Pistons hafa verið lunknir við að halda sér á lífi og alls unnið fjóra útsláttarleiki í þessari úrslitakeppni.

Cade Cunningham var stigahæstur með 21 stig og fimm þriggja stiga körfur, en hann fékk góða hjálp.

Jalen Duren átti sinn besta leik í einvíginu með 15 stig og 11 fráköst. Daniss Jenkins skoraði 15 stig og Paul Reed var með 17 stig af bekknum.

Duncan Robinson, sem missti af síðasta leik vegna meiðsla í mjóbaki, setti niður fjórar þriggja stiga körfur og skoraði 14 stig af bekknum.