Daníel ráðinn for­stjóri Ís­lenskrar erfðagreiningar

Í tilkynningu segir að Daníel muni leiða starfsemi fyrirtækisins á Íslandi og stýra áframhaldandi uppbyggingu fyrirtækisins sem einnar öflugustu rannsóknarmiðstöðvar heims á sviði erfðafræði mannsins.

„Með ráðningunni stefnir Amgen að því að efla enn frekar vísindastarf Íslenskrar erfðagreiningar og efla starf fyrirtækisins til uppgötvunar nýrra lyfjamarka og dýpri skilnings á meinafræði sjúkdóma,“ segir í tilkynningunni.

Daníel hefur starfað hjá Íslenskri erfðagreiningu um árabil. Þar er hann sagður hafa gegnt lykilhlutverki í vísindastarfi og vexti fyrirtækisins. Áður var hann yfirmaður tölfræðigreiningar og tók við stöðu yfirvísindamanns á síðasta ári.

„Ég hef fengið tækifæri til að vaxa og þróast með Íslenskri erfðagreiningu í tæpa þrjá áratugi og hlakka til að takast á við þetta nýja hlutverk. Við lifum tíma mikilla framfara í tilraunatækni og greiningaraðferðum, ekki síst á sviði gervigreindar,“ er haft eftir Daníel í tilkynningunni.

„Við munum áfram leggja áherslu á hágæða vísindastarf og trausta gagnagreiningu til að skapa nýja þekkingu sem dýpkar skilning okkar á sjúkdómum.“

Howard Chang, M.D., Ph.D., aðstoðarforstjóri alþjóðlegra rannsókna og vísindastjóri Amgen segir Daníel búa yfir djúpri sérþekkingu á þeim vísindalega og aðferðafræðilega grunni sem starfsemi og rannsóknir Íslenskrar erfðagreiningar byggja á.

„Íslensk erfðagreining gegnir áfram lykilhlutverki í alþjóðlegu rannsóknastarfi okkar og stefnu. Við munum byggja áfram á traustum grunni fyrirtækisins sem gegnir lykilhlutverki í erfðarannsóknum og stuðlar að raunverulegum framförum og framþróun í þágu sjúklinga.“