Lið Tómasar vann gífur­lega mikil­vægan sigur

Tómas Bent spilar ekki meira á tímabilinu eftir að hafa meiðst í síðasta mánuði en hann hafði stimplað sig inn sem lykilmaður á miðjunni hjá Hearts sem er á höttunum eftir sínum fyrsta meistaratitli í efstu deild Skotlands síðan árið 1960. 

Hearts hefur verið á toppi skosku úrvalsdeildarinnar lengst af á yfirstandandi tímabili en risarnir í Celtic og Rangers hafa verið að þjarma að liðinu eins og þeir geta. 

Liðsfélagar Tómasar lentu undir í leik dagsins þegar að Dujon Sterling kom Rangers yfir með marki á 23.mínútu. 

Heimamenn í liði Hearts létu hins vegar ekki deigann síga. Stephen Kingsley jafnaði metin fyrir Hearts snemma í seinni hálfleik og það var síðan Lawrence Shankland sem innsiglaði 2-1 sigur liðsins með marki á 71.mínútu. Lokatölur 2-1 sigur Hearts. 

Gífurlega mikilvægur endurkomusigur hjá Hearts því þegar að þrjár umferðir eru eftir af skosku úrvalsdeildinni situr liðið með þriggja stiga forskot á Celtic á toppi deildarinnar. 

Hearts og Celtic mætast í lokaumferð deildarinnar og því gæti farið svo að liðin mætist í hreinum úrslitaleik á Celtic Park þann 16.maí næstkomandi. Það verður hins vegar tíminn að leiða í ljós. 

Með þremur stigum meira og betri markatölu er Hearts í bílstjórasætinu, með örlögin í sínum eigin höndum þegar kemur að því að vinna skoska meistaratitilinn í fimmta sinn í sögu félagsins.