Tíu stoð­sendingar Martins dugðu skammt í toppslagnum

Bayern var fyrir leikinn með 50 stig á toppi deildarinnar en Alba með 46 stig í öðru sæti, en hafði einnig leikið leik meira. Ljóst var að Berlínarbúar þurftu sigur til að halda titilbaráttunni á lífi.

Úr varð spennandi leikur þar sem liðin skiptust á forystunni í fyrsta leikhluta. Bayern náði góðm kafla í öðrum leikhluta og komst mest níu stigum yfir en í hálfleik var staðan 42-37. Alba svaraði í þeim þriðja og komst mest fimm stigum yfir, 54-49, en Bæjarar svöruðu.

Staðan var jöfn 56-56 fyrir fjórða leikhlutann og spennan mikil. Þar voru það heimamenn frá Munchen sem stýrðu ferðinni og komust ellefu stigum yfir, 80-69, þegar þrjár mínútur voru eftir og var það mesti munurinn sem verið hafði í leiknum fram að því.

Alba svaraði með átta stigum í röð og aðeins þriggja stiga munur, 80-77, þegar 44 sekúndur lifðu leiks. Bayern svaraði með þristi til að komast 83-77 yfir 16 sekúndum síðar og niðurstaðan ljós.

Martin Hermannsson gaf tíu stoðsendingar í liði Alba Berlín og skoraði auk þess tvö stig og tók tvö fráköst.

Bayern vann 85-79 sigur og er með 52 stig á toppi deildarinnar eftir 31 leik, Alba Berlín er með 46 stig og hefur spilað 32 leiki. Bayern verður því deildarmeistari en úrslitakeppnin tekur við þegar 34 umferðum er lokið.