Tryggvi varði Evróputitil með Bilbao

Tryggvi og félagar mættu PAOK frá Grikklandi í tveggja leikja úrslitaeinvígi og höfðu tapað útileiknum með sex stiga mun. Þeir unnu þann mun hins vegar upp á heimavelli í kvöld og fögnuðu 89-74 sigri, og unnu einvígið því samtals 162-153.

Tryggvi var eins og fyrr segir í aðalhlutverki í kvöld, með mesta framlagið í liði Bilbao. Hann skoraði úr öllum fjórum skotum sínum úr opnum leik og alls níu stig, reif til sín flest fráköst eða sjö talsins, og var einn af þeim sem gáfu flestar stoðsendingar eða fimm.

Þetta er eins og fyrr segir annað árið í röð sem Bilbao vinnur þessa næststerkustu Evrópukeppni FIBA. Í fyrra urðu Tryggvi og félagar meistarar á útivelli en nú fengu þeir bikarinn í hendurnar á heimavelli.

„Það að vinna tvo titla í röð væri stórkostlegt. Ekki bara fyrir okkur leikmennina heldur líka stuðningsmennina, félagið og borgina,“ sagði Tryggvi í viðtali við heimasíðu FIBA fyrir leikinn í kvöld og nú hefur þetta orðið að veruleika.