„Ætlarðu að halda í hug­mynda­fræðina eða reyna að ná í úr­slit?“

FH tapaði fyrir KR í 4. umferð Bestu-deildar karla í gærkvöld og fór leikurinn 4-2. KR-ingar skoruðu fjögur mörk á FH-liðið í fyrri hálfleik.

Fimleikafélagið er aðeins með eitt stig eftir fjóra leiki og er útlitið dökkt hjá félaginu. Þeir Baldur Sigurðsson og Bjarni Guðjónsson fóru yfir leik liðsins í Stúkunni á Sýn Sport í gær.

„Ég held við höfum bara séð upplegg sem var á þá leið að setja þetta bara upp í hendurnar á KR-ingum. Það er óvanalegt að sjá lið koma á móti KR og byrja betur. FH gerði það í dag. Það var hörkukraftur í þeim og þeir fá færi eftir örfáar sekúndur og þeir voru grimmir,“ segir Baldur og heldur áfram.

„En svo sáum við bara strax að þetta er gríðarlega mikið verkefni fyrir Jóa Kalla. Það er þetta hápressuverkefni sem hann er í og það er bara komið allt of stutt til þess að þú getir farið í Vesturbæinn og reynt að pressa KR. Svo þarf hann líka að breyta vörninni. Fyrir mér er þetta kolvitlaust upplegg en það er síðan spurningin. Ætlarðu að halda í hugmyndafræðina eða reyna að ná í úrslit? Þetta var klárlega ekki eitthvað til þess að ná í úrslit eins og við sáum.“

Bróðir Jóa Kalla, Bjarni Guðjónsson, tók þá næst til máls.

„Við horfðum á KR í fyrra gera nákvæmlega sömu hluti og KR-ingar voru að býsnast yfir þessu, leik eftir leik eftir leik. Hversu lengi eigum við eftir að horfa á þetta? Markmanninn hátt, tapa leikjum, vera alltaf mikið með boltann, skora ekki neitt, skapa ekki neitt og tapa leikjum. Hugmyndafræðin lifði það af.“