Joshua snýr aftur og mætir Fury loksins í hringnum

Fyrrum heimsmeistararnir eru báðir komnir yfir sitt besta skeið en beðið hefur verið eftir bardaga á milli þeirra í mörg ár. Staðsetning og tímasetning liggja ekki fyrir að svo stöddu en stefnt er að því að bardaginn fari fram fyrir lok árs.

Joshua er að snúa aftur til átaka eftir að hafa lent í bílslysi undir lok síðasta árs. Hann var þá nýbúinn að berjast við samfélagsmiðlastjörnuna Jake Paul en lenti í bílslysi í heimalandi sínu Nígeríu. Joshua slapp óhultur en tveir félagar hans létust.

Þar sem Joshua hefur ekki barist í töluvert langan tíma mun hann undirbúa sig fyrir stóra bardagann gegn Fury með því að mæta auðveldari andstæðingi, hinum albanska Kristian Prenga, í júlí. Ef ekkert fer úrskeiðis þar mun Joshua svo mæta Fury.

Fury og Joshua eru báðir fyrrum heimsmeistarar í þungavigt en hafa aldrei mæst í hringnum.

Þeir voru með skipulagðan bardaga árið 2021. Fury var þá ríkjandi WBC heimsmeistari og hafði aldrei tapað bardaga. Joshua var hins vegar ríkjandi heimsmeistari hjá hinum þremur hnefaleikasamböndunum, WBA, IBF og WBO. Þá skarst hins vegar Deontay Wilder í leikinn og kærði bardagann, með þeirri niðurstöðu að Wilder mætti Joshua í staðinn.

Svo kom Oleksandr Usyk inn á sjónarsviðið. Joshua tapaði tveimur bardögum gegn honum árið 2021 og 2022. Fury tapaði einnig tvisvar fyrir honum árið 2024 en sneri aftur í hringinn fyrr á þessu ári og sigraði Arslanbek Makhmudov.

Eftir að hafa unnið endurkomubardagann ákvað Fury að skora Anthony Joshua á hólm. Það hefur nú tekist og samningar hafa náðst. Tveir af bestu hnefaleikaköppum sinnar kynslóðar munu því loks mætast, þó þeir séu báðir komnir vel yfir sitt besta skeið og hafi misst krúnuna til Usyk.