Fá leyfi til að leika sér í fríinu

Manchester City vann nauman 2-1 sigur á B-deildarliði Southampton í undanúrslitum bikarkeppninnar um helgina og átta dagar eru í næsta leik, þar sem liðið mætir Everton í ensku úrvalsdeildinni á mánudagskvöldið næsta.

Guardiola gefur sínum mönnum frí frá æfingum fram á miðvikudag.

„Þeir geta gert það sem þeim sýnist. Ef þeir vilja ferðast einhvert mega þeir það og gera hvað sem er. Svo lengi sem þeir skila sér á æfingu á miðvikudagseftirmiðdag,“

„Ég hef lært það í þessu landi að fleiri frídagar geti skilað betri frammistöðu. Margir segja að eftir því sem lið æfi meira verði það betra en ég er á öfugri skoðun. Það er mikilvægt að æfa, að sjálfsögðu, en þú þarft að mæta ferskur til leiks. Ég hef lært það,“ segir Guardiola.

Manchester City hefur þegar unnið enska deildabikarinn á leiktíðinni og komst um helgina í úrslit enska bikarsins. Liðið er þá þremur stigum frá Arsenal í toppbaráttunni á Englandi, en á leik inni.