„Allir að tikk­a inn og vörnin var bara framúr­skarandi“

Eftir mjög jafnan leik framan af keyrðu Grindvíkingar upp ákafann í vörninni í 4. leikhluta og tóku leikinn einfaldlega yfir og litu aldrei til baka.

„Vörnin fór að smella og þeir áttu erfitt með að skora. Við vorum að finna alla leikmenn einhvern veginn á hinum enda vallarins. Raggi Braga kom hérna inn á og var hreint út sagt stórkostlegur hérna í 4. leikhluta.“

„Allir að tikka inn og vörnin var bara framúrskarandi í fjórða og í lok þriðja.“

Ragnar smellti í tvo þrista í röð og breytti stöðunni úr 71-70 í 77-70 eins og hendi væri veifað. Svona innkoma kveikir í liðum.

„Klárlega og sérstaklega þegar það kemur einhver svona klár af bekknum. Ekki búinn að spila fyrstu þrjá og kemur svo inn á og dúndrar niður tveimur þristum í röð. Þriðji var reyndar „way off“ en það er annað mál,“ - sagði Ólafur og glotti, „stór plús í kladdann á Ragga.“

Á þessum tímapunkti var varla hægt að halda áfram með viðtalið þar sem lætin í troðfullri stúkunni voru ærandi þar sem Grindvíkingar sungu allir saman „Og þeir skora“.

„Þetta gæti ekki verið betra! Það er jarðskjálftahrina í stúkunni. Spurning hvort við megum vera hérna, ef við erum á eigin ábyrgð.“