Lárus hefur á­huga á að þjálfa Þór Þor­láks­höfn á­fram

Tap fyrir Grindavík í lokaumferð deildarkeppninnar í gær staðfesti fall Þórs Þorlákshafnar niður í 1. deildina. Fimm árum eftir að liðið varð Íslandsmeistari. Þórsarar sett mikinn og góðan svip á efstu deild.

Samningur Lárusar, sem hefur stýrt Þór Þorlákshöfn við góðan orðstír frá árinu 2020, er að renna sitt skeið. Óvíst er hvort framhald verði á samstarfi hans og félagsins á þessari stundu.

„Við höfum ekkert rætt framhaldið. Næstu skref eru kannski að hitta liðið, sleikja aðeins sárin og svo spjalla ég við stjórnina í framhaldi af því,“ segir Lárus í samtali við Vísi.

En hefurðu áhuga á því að halda áfram sem þjálfari liðsins?

„Þór Þorlákshöfn hefur náttúrulega verið stór partur af minni fjölskyldu síðastliðin sex ár. Okkur hefur liðið rosalega vel hérna. Sérstaklega sökum þess hversu gott fólk er í kringum félagið. Fyrir mitt leiti hef ég að sjálfsögðu áhuga á að starfa aftur fyrir Þór.“

Og halda áfram í þessu starfi sem þjálfari? Byggja liðið aftur upp og koma því aftur í deild þeirra bestu?

„Já. En staðan er náttúrulega þannig að það þurfa að vera tveir að dansa þennan tangó. Ég veit ekki hver áhuginn er hjá Þór en við tökum það spjall yfir kaffibolla. Ég og Jóhanna (Jóhanna M. Hjartardóttir, form. KKD. Þórs Þorlákshafnar).“