Katrín til­nefnd í stjórn Eikar

Tilnefningarnefnd Eikar fasteignafélags hefur tilnefnt fimm manns í stjórn, eins og fram kemur í skýrslu nefndarinnar. Boðað hefur verið til aðalfundar hinn 16. apríl í Turninum við Smáratorg. Eik er eitt stærsta fasteignafélag landsins og er skráð í kauphöll Íslands en félagið sérhæfir sig í útleigu atvinnuhúsnæðis.

Katrín er sú eina tilnefnda sem ekki er þegar í stjórn félagsins. Guðrún Bergsteinsdóttir lögmaður, sem hefur verið stjórnarmaður frá 2016, er ekki tilnefnd í skýrslunni en ekki liggur fyrir hvort hún sækist eftir endurkjöri. 

Hinir tilnefndu eru:

1. Katrín Jakobsdóttir
2. Bjarni Kristján Þorvarðarson stjórnarformaður
3. Eyjólfur Árni Rafnsson stjórnarmaður
4. Gunnar Þór Gíslason stjórnarmaður
5. Ragnheiður Harðar Harðardóttir stjórnarmaður

Í rökum tilnefningarnefndar er bent á að Katrín hafi víðtæka og einstaka stjórnunar- og leiðtogareynslu, hæfni og þekkingu á flóknum viðfangsefnum sem krefjist meðal annars samvinnu og hagsmunajafnvægis. Hún hafi langa reynslu af stjórnsýslu, stefnumótun og breytingastjórnun og ákvörðunartöku við erfiðar og flóknar aðstæður.

„Hún hefur mikla innsýn í virkni hagkerfisins og samfélagsins auk þess sem hún býr að sterkum alþjóðlegum tengslum og umtalsverðri reynslu af alþjóðastarfi,“ segir í röksemdafærslu nefndarinnar.|

Katrín hefur tekið að sér fjölda verkefna frá því að hún vék úr ráðherratóli og hætti sem formaður VG. Í desember tók hún við stöðu stjórnarformanns nýrrar gervigreindarmiðstöðvar Norðurlandanna og Eystrasaltsríkjanna. Í apríl í fyrra tók hún einnig við sem stjórnarformaður nýs Rannsóknarseturs um jafnrétti í efnahags- og atvinnulífi. Þá hefur hún sæti í háskólaráði og gaf út glæpasögu ásamt Ragnari Jónssyni síðustu jól