Guð­björg hlaut heiðurs­verð­laun í London

Búðin hefur fyrir löngu fest sig í sess sem ein virtasta skartgripaverslun Íslands en Aurum hlaut nýverið hin virtu ævistarfsverðlaun eða Lifetime Achievement Award 2026 í Bretlandi. Er þetta í fyrsta sinn sem íslenskt skartgripafyrirtæki hlýtur slík verðlaun.

Verðlaunin voru hluti af bresku brúðkaups- og brúðkaupsferðar verðlaunum eða UK Wedding & Honeymoon Awards, sem haldin eru hátíðleg í London á ári hverju. 

Þau eru veitt einstaklingum og fyrirtækjum innan brúðkaups- og ferðageirans sem hafa skarað fram úr og lagt mikið af mörkum til listgreinarinnar.

Guðbjörg og eiginmaður hennar Karl Jóhann Jóhannsson fóru út með dætrum sínum þremur og voru þau í skýjunum með viðurkenninguna. 

Hjónin settu vörumerkið á laggirnar árið 1999 og hefur Guðbjörg hannað skart fyrir stórstjörnur á borð við Katy Perry. 

„Að hljóta þessi heiðursverðlaun er sérstaklega stór viðurkenning fyrir Aurum, sem hefur í áratugi lagt áherslu á vandað handverk, tímalausa hönnun og persónulega nálgun við viðskiptavini sína,“ segir Guðbjörg og bætir við:

„Þessi viðurkenning er okkur afar dýrmæt og táknar mikla viðurkenningu á þeirri ástríðu og vinnu sem hefur verið lögð í Aurum í gegnum árin. 

Við höfum alltaf haft það að leiðarljósi að skapa skart sem hefur merkingu og endist kynslóðum. Að fá þessa viðurkenningu á alþjóðlegum vettvangi er bæði heiður og hvatning til að halda áfram á sömu braut.“

Kvöldið var vægast sagt ógleymanlegt hjá fjölskyldunni. 

„Það var ótrúleg upplifun að fá að standa á sviðinu í London og taka við þessum verðlaunum. 

Fyrir okkur sem fjölskyldufyrirtæki er þetta ekki aðeins viðurkenning á starfi okkar heldur líka á öllum þeim viðskiptavinum sem hafa treyst okkur til þess að skapa skart fyrir sín stærstu augnablik,“ segir Guðbjörg að lokum.