Gerpla full­komnaði frá­bæra bikar­helgi

Helgin heppnaðist fullkomlega fyrir Gerplu því í gær varð liðið bikarmeistari í áhaldafimleikum, bæði í kvenna- og karlaflokki.

Þær Hildur Maja Guðmundsdóttir, Thelma Aðalsteinsdóttir, Lilja Katrín Gunnarsdóttir, Rakel Sara Pétursdóttir og Agnes Suto skipuðu sigurlið Gerplu í áhaldafimleikum kvenna í gær, og þeir Atli Snær Valgeirsson, Ágúst Ingi Davíðsson, Dagur Kári Ólafsson, Sigurður Ari Stefánsson og Martin Guðmundsson skipuðu bikarmeistaraliðið karlamegin.

Í hópfimleikunum í dag var spennan mikil kvennamegin en að lokum tókst Gerplu að endurheimta titilinn, eftir að Stjarnan hafði unnið síðustu tvö ár.

Stjörnukonur urðu að sætta sig við silfur í ár og Selfoss tók bronsið. Gerplukonur voru afar vel að sigrinum komnar því þær fengu hæstu einkunn á öllum þremur áhöldunum. Þær fengu alls 53,450 í einkunn og voru 2,875 stigum á undan Stjörnunni. Selfyssingar voru rétt á eftir Stjörnunni, eða aðeins 0,475 stigum.

Þrátt fyrir að Stjörnumenn væru einir í keppni karlamegin, í Egilshöllinni í dag, létu þeir það ekki trufla sig og sýndu frábær tilþrif, og enduðu með 52,250 í heildareinkunn.