Nottingham Forest og Crystal Palace fóru bæði á­fram

Landsliðsmarkvörðurinn Elías Rafn Ólafsson og félagar hans í danska félaginu Midtjylland eru úr leik eftir 3-0 tap í vítakeppni á móti Nottingham Forest.

Elías Rafn hélt hreinu í 1-0 sigri í fyrri leiknum á Englandi en Forest-menn skoruðu tvisvar hjá honum í venjulegum leiktíma í dag. Nicolás Dominguez kom Forest í 1-0 með skalla á 41. mínútu eftir fyrirgjöf Nikola Milenkovic. Ryan Yates bætti svo við öðru marki á 52. mínútu með þrumuskoti fyrir utan teig.

Martin Erlic minnstaði muninn í 2-1 og því stóðu leikar 2-2 samanlagt. Ekkert var skorað í framlengingunni og Danirnir skoruðu ekki heldur í vítakeppninni.

Á meðan Forest-menn nýttu allar þrjár vítaspyrnur sínar á móti Elíasi klúðruðu liðsfélagar hans öllum þremur vítum sínum. Tvær fóru í stöngina og sú þriðja hitti ekki markið.

Ismaila Sarr var hetja Crystal Palace þegar liðið fór áfram eftir 2-1 sigur á AEK Larnaca á Kýpur.

Sarr skoraði bæði mörkin, þar á meðal sigurmarkið í framlengingu. Fyrri leikurinn endaði með markalausu jafntefli í Englandi og því fór Palace áfram 2-1 samanlagt.

Sarr kom Palace í 1-0 á 13. mínútu en Enric Saborit jafnaði metin á 63. mínútu. Saborit fékk sitt annað gula spjald tíu mínútum síðar og heimamenn kláruðu leikinn manni færri.

Staðan var 1-1 eftir venjulegan leiktíma og því varð að framlengja. Sarr skoraði sigurmarkið á 99. mínútu og Kýpverjarnir misstu síðan annan mann af velli með rautt spjald og enduðu því níu á móti ellefu.