„Þessi breyting hjá Kefla­vík var hálf­gerð þvæla“

Morsell var látinn fara í kringum áramótin og Remy Martin kom í hans stað. Martin hefur aðeins spilað þrjá leiki fyrir liðið og glímt við meiðsli að undanförnu. Á meðan hefur Morsell blómstrað með liði ÍA, meðal annars í sigri gegn Keflavík.

Þó Keflavík hafi komist aftur á sigurbraut í þessari umferð gegn Álftanesi og sé með sæti í úrslitakeppninni tryggt, segja sérfræðingarnir að liðið væri í enn betri stöðu með Morsell innanbúða.

„Það sem maður hefði áhyggjur af hjá honum í Keflavík, hvort hann væri nógu mikill go to gæji, hann er að sýna það að hann getur tekið af skarið og verið aðalskorarinn,“ sagði Benedikt Guðmundsson.

Teitur Örlygsson tók undir og segist hafa séð fyrir um þessi mistök.

„Ég var nú alveg ófeiminn við að segja það, bæði hér í þættinum og við vini mína, þessi breyting hjá Keflavík var hálfgerð þvæla. Nú hugsar maður um þetta Keflavíkurlið, að þeir hafi ekki verið aðeins þolinmóðir og leyft liðinu að stilla sig betur saman. 

Maður hugsar, ef þú bætir Morsell inn í varnarleik Keflvíkinga, af því hann er frábær varnarmaður líka… Ég er sannfærður um það, ef Keflavík hefði ekki farið í þessar breytingar, þá væru þeir með heimaleikjarétt í fyrstu umferð [en ekki í 5. sæti],“ sagði Teitur.