10cc spilar á Ís­landi í sumar

Þetta kemur fram í tilkynningu frá Tónleik ehf. sem kemur að tónleikum sveitarinnar hér á landi. Þar er sveitinni lýst sem einni þeirra áhrifamestu í poppinu. 

„Graham Gouldman og frábært tónleikaband hans stíga á svið í Eldborgarsal Hörpu. Sveitin hefur áratugum saman skipað sér sess meðal merkustu nafna poppsins og tónlist hennar heldur áfram að höfða til nýrra kynslóða.“

Meðal helstu laga sveitarinnar má nefna I’m Not In Love, Dreadlock Holiday, Rubber Bullets, Good Morning Judge, Donna, Wall Street Shuffle og The Things We Do For Love sem hafa gengið í gegnum endurnýjun lífdaga í kvikmyndum og þáttum á borð við Guardians of the Galaxy, After Life, Bridget Jones, Snatch og The Social Network.

„Endurnýjaðar vinsældir sveitarinnar hafa þýtt uppselda tónleika víða um heim, þar á meðal í hinu goðsagnakennda Royal Albert Hall í London fyrr á árinu. Þar steig Kevin Godley óvænt á svið og söng í fyrsta sinn lagið ”Cry” með sveitinni á tónleikum,“ segir í tilkynningunni. Godley var einn af stofnendum sveitarinnar árið 1972.

Graham Gouldman, stofnandi, bassaleikari, gítarleikari og söngvari, hefur stýrt 10cc frá upphafi en núverandi skipan byggir á traustum grunni úr sögu sveitarinnar. Gítarleikarinn Rick Fenn hefur verið hluti af 10cc-fjölskyldunni síðan á áttunda áratugnum, en Keith Hayman, Iain Hornal og Ben Stone fullkomna hópinn.

Fjórtán ár frá síðustu heimsókn

Hljómsveitin kom hingað til lands árið 2012 og tróð upp í Háskólabíói. Egill Helgason fjölmiðlamaður var á meðal tónleikagesti og skrifaði umfjöllun um tónleikana í DV. 

„Maður vissi ekki hverju maður átti von á á tónleikunum í Háskólabíói í gærkvöldi, en þeim mun meiri var gleðin þegar þeir reyndust vera frábær upplifun.“

Gouldman er á áttugasta aldursári en Egill snerti einmitt á aldri forsprakkans í gagnrýni sinni.

„Graham Gouldman er varla kominn á grafarbakkann. Hann er fæddur 1946. Á tónleikunum í gær fékk maður yfirlit yfir feril þessa flotta tónlistarmanns. Það voru reyndar flutt fleiri lög en úr fórum 10CC – ég vissi ekki að hann væri höfundur laga eins og No Milk Today sem Herman´s Hermits fluttu, Bus Stop og For Your Love sem urðu fræg með Hollies og For Your Love sem var stærsti smellur The Yardbirds.“