Bears gætu flutt frá Chicago til Indiana

Núverandi völlur félagsins, Soldier Field, er á besta stað í Chicago. Hann er aftur á móti kominn til ára sinna og þarf að byggja nýjan völl á næstu árum.

Forráðamenn Bears hafa lengi verið í viðræðum við fulltrúa Illinois-fylkis um nýja völlinn. Málið snýst að sjálfsögðu um peninga á endanum. Bears þarf skattaafslátt og peninga frá skattborgurum til þess að reisa nýjan völl.

Viðræður við fylkisstjórann í Illinois og borgarstjóra Chicago hafa engu skilað og því fóru forráðamenn Bears að líta út fyrir fylkismörkin.

Því var heldur betur fagnað í Indiana-fylki og þar er þegar búið að samþykkja frumvarp til þess að greiða leið Bears inn í fylkið. Íbúum og stuðningsmönnum Bears til mikillar gremju en félagið er orðið 105 ára gamalt.

Í gær var tilkynnt að búið væri að finna svæði fyrir völlinn í Indiana. Það svæði er við Wolf Lake í Hammond. Það er alveg upp við fylkismörkin og hluti svæðisins er í úthverfi Chicago.

Fari svo að framtíðarvöllur Bears verði þar þurfa stuðningsmenn félagsins ekkert að örvænta því aðeins tekur 25 mínútur að keyra frá Soldier Field að nýja vellinum. En hann yrði í vitlausu fylki í hugum borgarbúa Chicago.