Díana í loka­prófi og missir af mikil­vægum lands­leik

Þetta staðfesti Díana við Handkastið og því ljóst að landsliðið þarf að spjara sig án hennar á Ásvöllum 4. mars, þegar Svartfellingar koma í heimsókn í undankeppni EM.

Díana er engu að síður í landsliðshópnum sem Arnar Pétursson þjálfari tilkynnti í gær, og verður til taks í seinni leiknum við Svartfellinga á útivelli 8. mars.

Í samtali við Handkastið segir hún einfaldlega ekki mögulegt að fá að fresta lokaprófinu. Mikið sé undir því taki hún ekki prófið, eða falli á því, þá megi hún ekki skrifa mastersritgerð sína á næstu önn.

„Því miður þá er staðan svona og engin sjúkrapróf í boði í skólanum heldur en vonandi er þetta bara síðasta prófið mitt í flugvélaverkfræðinni og þá þarf ekki að vera að púsla þessu öllu saman alltaf,“ sagði Díana.

Ísland er í slæmri stöðu í undankeppninni eftir naum töp gegn Færeyjum og Portúgal í fyrstu leikjunum. Tvö efstu lið hvers riðils komast á EM sem og liðin í 3. sæti með bestan árangur í fjórum af sex riðlum. Svartfellingar hafa á að skipa besta liði riðilsins og unnu Ísland með níu marka mun, 36-27, á HM í desember.