KR-konur frystar í Hvera­gerði í kvöld

Þetta var aðeins þriðji deildasigur Hamars/Þórs á leiktíðinni en tveir þeirra hafa komið í síðustu þremur leikjum á móti liði í toppbaráttunni því Njarðvík fór líka stigalaust heim á dögunum.

Hallgrímur Brynjólfsson tók við Hamars/Þórs-liðinu á dögunum og byrjar frábærlega.

KR-konur byrjuðu ágætlega og voru fimm stigum yfir eftir fyrsta leikhluta, 24-19.

Heimakonur tóku öll völd með því að vinna annan leikhlutann með tíu stigum (30-20) og þriðja leikhlutann með fimmtán stigum (29-14).

Eftir það var á brattann að sækja hjá gestunum úr Vesturbænum.

Heimakonur með Jadakiss Gunn og Mariönu Duran í fararbroddi lönduðu flottum sigri. Gunn var stórkostleg með 38 stig, 9 stoðsendingar og 6 fráköst en Duran bætti við 26 stigum, 9 fráköstum og 5 stoðsendingum. Ana Clara Paz skoraði síðan 24 stig.

Jiselle Thomas skoraði 24 stig fyrir KR, Molly Kaiser var með 21 stig og Eve Braslis skoraði 16 stig.

Hamar/Þór er í baráttu við Ármann um að forðast botnsætið, sem þýðir fall, en níunda sætið skilar sæti í umspil. Hamar/Þór er nú komið með tveggja stiga forskot á Laugardalsliðið.

Þetta tap er aftur á móti áfall fyrir KR í baráttunni um deildarmeistaratitilinn en þær hefðu komist upp að hlið toppliðs Njarðvíkur með sigri.