Fær fjögurra leikja bann og missir af Lundúnaslagnum

Leikur United og Tottenham stendur nú yfir og var í jafnvægi þangað til Romero fékk rauða spjaldið. Hann var rekinn beint í sturtu fyrir að stíga harkalega á ökkla Casemiro, sem varð á undan honum í boltann.

Fyrir beint rautt spjald fá leikmenn þriggja leikja bann en Romero fær fjögurra leikja bann því þetta er hans annað rauða spjald á tímabilinu.

Romero fékk einnig rautt spjald í 1-2 tapi gegn Liverpool þann 20. desember.

Þess á milli þurfti Romero að fara af velli vegna veikinda, í leik gegn Manchester City um síðustu helgi og þá hefur hann gagnrýnt stjórnarmenn félagsins töluvert fyrir aðgerðaleysi á félagaskiptamarkaðnum.

Næstu fjórir leikir Tottenham eru gegn Newcastle, Arsenal, Fulham og Crystal Palace.