„Spiluðum virki­lega vel í tuttugu mínútur“

„Mér fannst í 3. leikhluta Grindavík bara setja í annan gír og á þeim tímapunkti voru þær sterkari en við,“ sagði Israel Martin í leikslok.

„Við héldum áfram að reyna að keyra að körfunni, en fengum ekki endilega það sem við vildum. Mér finnst við vera með lið sem er gott að keyra á körfuna og í gegnum varnir, en það gekk ekki upp núna og þá fór þessi leikur. En mér fannst við ná að opna leikinn oft vel. Við spiluðum virkilega vel í tuttugu mínútur á móti einu besta liði deildarinnar og ég er mjög ánægður með hvað stelpurnar lögðu mikið á sig. Ég vona bara að við verðum í sömu stöðu á næsta ári.“

Tindastólsliðið lenti í basli strax í upphafi leiks og lenti 11-0 undir. Eftir það var liðið alltaf að elta og Martin segir það mögulega hafa tekið of mikla orku úr sínu liði.

„Já, mögulega. Við vorum að spila stærstan hluta leiksins á níu leikmönnum og allar sem komu inn á reyndu sitt allra besta. Auðvitað eru sveiflur í þessum leikjum, en mér fannst við stjórna tempóinu á stórum köflum. Kannski vantaði bara aðeins upp á gæðin.“

„En þetta var góð reynsla fyrir okkur og við tökum margt jákvætt með okkur úr þessum leik.“

En hvað getur liðið lært af þessum leik að mati þjálfarans?

„Númer eitt er að heimastelpurnar okkar eru að fá fullt af mínútum. Við erum með margar ungar heimastelpur og einhverjar af þeim eru að spila líklega yfir tuttugu mínútur í svona stórum leik. Það er virkilega gott fyrir okkur og hjálpar okkur í framtíðinni.“

Hann segir að lokum að næstu dagar verði nýttir í slökun og æfingar fyrst að liðið er ekki á leið í úrslitaleik á laugardaginn.

„Nú er bara endurheimt á morgun, æfing á föstudag og hvíld á laugardaginn. Svo á sunnudaginn byrjar bara undirbúningur fyrir leikinn á miðvikudaginn á móti Hamar/Þór. Það er virkilega gott lið og þessi mánuður mun líklega segja til um hvar við verðum í töflunni í lok tímabils,“ sagði Martin að lokum.