Hár­kollan fauk af í miðjum bar­daga

Í 2. lotu sló Ibeh til Millers. Ekki nóg með það heldur sló hann hárkolluna af höfði Millers svo í ljós kom stór skallablettur.

Miller lét það ekki á sig fá, reif kolluna alveg af fyrir 3. lotuna og kastaði henni upp í stúku. Hún endaði hjá WBO heimsmeistaranum Fabio Wardley.

Öfugt við Samson í Biblíusögunni lét Miller hárleysið ekki hafa áhrif á sig og eftir bardagann henti hann gaman af uppákomunni.

„Ég er grínisti. Þú verður að gera grín að sjálfum þér,“ sagði Miller sem fékk kolluna tveimur dögum fyrir bardagann. Hann sagðist hafa misst hárið eftir að hafa þvegið sér með sjampói sem hann fann heima hjá móður sinni.

Bardaginn í gær var sá fyrsti hjá Miller síðan hann gerði jafntefli við Andy Ruiz í ágúst 2024. Miller hefur unnið 26 af 29 boxbardögum sínum á ferlinum.